Kilimo na Umwagiliaji

Wilaya ina hekta  162,000 ambazo zinafaa kwa Kilimo, hekta  83,270.5 ndizo zinalimwa kwa sasa. Mazao yanayozalishwa kwa wingi ni pamoja na Ndizi, Maharage, Mahindi, Viazi vitamu, Viazi Mviringo, Ulezi, Mtama, Uwele, na Kahawa.

Mazao makuu ya Chakula ni Ndizi, Mahindi, Maharage, na Viazi ambapo Kahawa, Mtama, na Ndizi Kali ni mazao ya Biashara. Kilimo kinakisiwa kuchangia 75% kwenye pato la Wilaya. Wananchi 85% wamejiajiri kwenye shughuli za kilimo.

Umwagiliaji

Kwa sasa Kilimo cha Umwagiliaji kinafanyika sehemu chache sana na kwa wakulima baadhi tu. Kwa kuliona hili tatizo Halmashauri kupitia idara ya Kilimo, Umwagiliaji na Ushirika imeandaa andiko la mradi "District Investment Profile" ambalo limeainisha maeneo yanayofaa kwa uwekezaji wa Kilimo Cha Umwagiliaji. Maeneo/Vijiji/Kata yaliyopo kwenye mpango wa matumizi haya ni pamoja na Ziwa Karenge, Ziwa Rushwa, Ziwa Rwere-Nkwenda, Mto Kagera, Safu za milima ya Kyerwa, na Bonde na Sina.

Hali ya chakula

Hali ya Chakula Wilaya ya Kyerwa kwa sasa inaridhisha kutokana na wakazi wanaostahili kuwepo. Kiasi kinachozalishwa kwa sasa kingekuwa zaidi endapo kusingelikuwepo na ugonjwa wa Mnyauko unaoshambulia zao la Mgomba (Unyangano).

Matumizi ya zana za Kilimo

Wilaya kwa sasa haina Matrekta ya kutosha kwa ajili ya Kilimo hivyo kufanya wakulima walio wengi kutumia jembe la mkono. Katika kulikabiri hili Wilaya imeelekeza jitihada za makusudi kuwahamasisha wakulima binafsi kujikita katika ulimaji wa kutumia wanyama kazi kama Ng'ombe wa maskai na jembe la Plau. Pia Halmashauri inahamasisha wakulima kujiunga katika Vikundi ili kujenga mazingira mazuri ya kupata mkopo nafuu wa Matrekta kupitia SUMA JKT.

Juhudi za Halmashauri katika kuendeleza sekta ya Kilimo

Kutokana na Kilimo kuwa tegemeo la kiuchumi kwa wananchi waliowengi Wilayani Kyerwa, Serikali kupitia Halmashauri imejipanga kuboresha yafuatayo ili kuinua uzalishaji wa mazao ya kilimo:-

1. Kusimamia na kuratibu shughuli za Pembejeo za Kilimo Wilayani.
2. Kuendelea kupokea taarifa za mwenendo wa Pembejeo toka Vijiji nufaika.
3. Kukagua na kusimamia Wagani katika Vijiji na Kata.
4. Utekelezaji na uendelezaji wa zao la Kahawa kwa kufuata mnyororo wa thamani katika Vijiji vya Rukuraijo, Rutunguru, na Omukagando.
5. Kudhibiti visumbufu vya mimea (Unyangano).
6. Kuandaa shamba darasa kwa ajili ya kudhibiti unyanjano (BXW).
7. Kuhakikisha Wakulima wanapata Pembejeo kwa wakati.
8. Wagani kupatiwa vitendea kazi kwa wakati kama vile usafiri.